حكاية حلم ...
 |
| قصيدة: حكاية حلم...، فاطمة المرسي |
حكاية حلم...
......................……….
ف الليل بشد الرِحال
بين الجُفون والعين
ألقَى الزمن أزمان
ومافيش حساب لسنين
ومافيش مكان لمكان
كل المدىَ فاضي
لا فيه سما ولا أرض
ولا سهل ولا وادي
لكن هناك شبابيك
مفتوحه عَ الماضي
أتوه فى درب الخيال
واحتار مابين ومابين
أنا إنس والّا جان؟
والّا أنا الاتنين؟
يمكن أكون قارب
مُشتاق لبر أمان
أو نجمه مهمومه
واقعه فى بحر غيام
والا قمر فرحان
مالي الصحاري ضَيْ
السِكَّه طَوياني
والرحله مالهاش زَيْ
وان قلت آه ياني
ألقى اللي رايح جَيْ
أشباح كتير بتمر
مالهاش لا طول ولا عرض
يسحبني خوفي بعيد
ويسبني للمجهول
مرَّه يساعدني ملاك
فجأه يطاردني غول
أنده بعلو الصوت
وانا وحدي سمعاني
أوصل حدود الموت
والتوهه وخداني
أحلامي ياعجيبه ..
يا ام القدر مكتوب
لا اللي انكتب عاجب
ولا الخيال بيتوب...!!
.......................…..
فاطمة المرسي
إرسال تعليق